🌸 माझी चारधाम यात्रा : तिसरा धाम – रामेश्वर 🌸

— Jayeshri Patil

चारधाम यात्रेतील माझा तिसरा धाम – रामेश्वर.

ही केवळ देवदर्शनाची यात्रा नव्हती, तर अनेक अनुभव, कष्ट, समाधान, श्रद्धा आणि आठवणी घेऊन आलेला एक अविस्मरणीय प्रवास होता. या प्रवासात दररोज जे पाहिलं, अनुभवलं ते मी माझ्या मुलाला छोट्या-छोट्या अपडेट्समध्ये पाठवत होते. तेच आज या ब्लॉगच्या रूपात मांडत आहे.

🚌 पहिला टप्पा – हैदराबाद ते श्रीशैलम

२१ जानेवारी २०२६ – बुधवार (३रा दिवस)
सकाळी ७.३० वाजता हैदराबादमधील हॉटेलवरून निघालो.
रामोजी फिल्म सिटीला भेट दिली. तिथले शो – फिल्मी दुनिया, स्पेस यात्रा – खूपच छान होते. संध्याकाळी चार मिनार पाहायला गेलो. रात्री साधं घरगुती जेवण – वरण-भात, वांगीची भाजी, पोळी.
रात्रीच गाडीत बसलो… पुढचं ध्येय – श्रीशैलम मल्लिकार्जुन.

२२ जानेवारी – गुरुवार (४था दिवस)
सकाळी ८ वाजता पातळ गंगा (कृष्णा नदी) येथे स्नान.
१० वाजता श्रीशैलम मल्लिकार्जुन ज्योतिर्लिंग, मल्लम्मा देवी, शिव मंदिर अशी अनेक देवदर्शनं.
सकाळी पुरी-बटाटा भाजीचं जेवण.
सायंकाळी तिरुपती बालाजीच्या दिशेने प्रवास सुरू.

🛕 तिरुपती बालाजी – श्रद्धा आणि संयम

२३–२४ जानेवारी (५वा–६वा दिवस)
तिरुपतीला पोहोचलो. हस्ती मंदिर खूप भव्य, कोरीव दगडाचं.
बालाजी दर्शनासाठी पहाटे ५ वाजता निघालो. साडेसातला रांगेत उभे राहिलो.
१३ तासांनंतर दर्शन झालं 🙏
थकवा होता, पण दर्शनानंतर मन खूप शांत झालं.

टीप : प्रसाद घेताना कॅरीबॅग घरून नेली तर पैसे वाचतात.

याच दरम्यान –
वेणुगोपाल स्वामी, पद्मावती देवी, गोविंदराज स्वामी, गणपती मंदिर, पापनाशन, आकाशगंगा, हनुमान मंदिर अशी अनेक दर्शनं झाली.

🌊 तमिळनाडू – वेल्लोर, महाबलीपुरम आणि रामेश्वरकडे वाटचाल

२५–२६ जानेवारी (७वा–८वा दिवस)
वेल्लोर येथील महालक्ष्मी मंदिर – चांदीचा गणपती, सोन्याची देवी, खूप सुंदर दर्शन.
काही मंदिरं रद्द झाली कारण रस्ते बंद होते.
महाबलीपुरम येथे मुक्काम. सकाळी समुद्र दर्शन – रूमच्या अगदी शेजारीच समुद्र 🌊
दुपारी रामेश्वरकडे निघालो. रात्रीचा पूर्ण प्रवास बसमध्येच.

🌅 कन्याकुमारी – सूर्योदय आणि अध्यात्म

२८–२९ जानेवारी (१०वा–११वा दिवस)
कन्याकुमारी येथे पोहोचलो.
पहाटे ६.३० वाजता सूर्योदय पाहिला – शब्दात सांगता येणार नाही असा अनुभव.
देवी मंदिर दर्शन, बोटीने स्वामी विवेकानंद स्मारक पाहिलं.
नंतर मदुराई येथील मीनाक्षी मंदिर दर्शन – खूप भव्य आणि दिव्य.

🏞️ म्हैसूर, बंगलोर, गोकर्ण – शेवटचा टप्पा कोल्हापूर

३०–३१ जानेवारी (१२वा–१३वा दिवस)
म्हैसूर पॅलेस, चामुंडा देवी, वृंदावन गार्डन पाहिलं.
खरेदीसाठी रामेश्वर आणि कन्याकुमारी जास्त चांगली ठिकाणं वाटली.
बंगलोरमध्ये इस्कॉन मंदिर दर्शन करून गोकर्णकडे प्रयाण.

१ फेब्रुवारी (१४वा दिवस)
गोकर्ण – समुद्र, मंदिर, शांतता.
शिवपिंडाला स्पर्श करून दर्शन घेतलं.
मन भरून आलं.
संध्याकाळी कोल्हापूरकडे प्रवास सुरू.

कोल्हापूर – महालक्ष्मी आणि घरवापसी

सोमवार, २ फेब्रुवारी
पहाटे कोल्हापूर. गरम पाण्याने स्नान, शांततेत महालक्ष्मी देवीचं दर्शन—गर्दी कमी, मन निवांत. नंतर जेवण—मटर पनीर, जिलेबी, वरण-भात, पापड-पोळी.
आणि शेवटी… नाशिककडे परतीचा प्रवास.

🙏 शेवटचं मनोगत

ही यात्रा म्हणजे केवळ प्रवास नव्हता.
रांगा, थकवा, रात्रीचे मुक्काम गाडीत… सगळं होतं.
पण प्रत्येक दर्शनानंतर मनात जी शांती मिळाली, ती सगळं विसरायला लावणारी होती.

रामेश्वर – माझ्या चारधाम यात्रेतील तिसरा धाम – आयुष्यभर लक्षात राहील असा अनुभव ठरला.

जय भोलेनाथ 🙏
जय श्रीराम 🙏